Outarelo 2022, de Bodegas Blare S.L., conquista o Acio de Prata autonómico o mellor tinto de colleitas anteriores

O Auditorio de Lugo foi o escenario no que durante a tarde de onte se coñeceron os viños premiados nas Catas de Galicia 2026, o certame organizado pola Xunta de Galicia para recoñecer a calidade dos viños, augardentes e licores da comunidade.

Na categoría correspondente á D.O. Valdeorras, o Acio de Ouro Branco foi para Joaquín Rebolledo, elaborado por Joaquín Rebolledo S.A., mentres que o Acio de Ouro Tinto recaeu en Menciño Summum, da Bodega Cooperativa Jesús Nazareno.

O resto do palmarés da denominación complétano A Coroa, de Adega A Coroa SAT, co Acio de Prata Branco; Verdes Castros, de Vinigalicia S.L., co Acio de Bronce Branco; Quinta da Peza, de Quinta da Peza S.L., co Acio de Prata Tinto; e Costeira, de Viña Costeira S.C.G., distinguido co Acio de Bronce Tinto.

A estes recoñecementos súmase ademais o obtido por Outarelo 2022, de Bodegas Blare S.L., que foi distinguido co Acio de Prata Tinto na categoría de Viños de Colleitas Anteriores, un galardón no que compiten viños de todas as denominacións de orixe galegas.

Máis de medio cento de expertos

A trixésimo oitava edición das Catas de Galicia reuniu 462 mostras correspondentes a 152 empresas, a maior parte delas pertencentes ao sector vitivinícola. O proceso de selección contou coa participación de máis de medio cento de expertos nas fases de precata e de cata final, esta última realizada por un panel integrado por doce profesionais de recoñecido prestixio no ámbito da enoloxía, encargados de avaliar as mostras presentadas seguindo criterios de calidade, tipicidade e excelencia.

Durante o acto de entrega dos premios, a Xunta destacou o papel do sector vitivinícola como un exemplo representativo da Galicia Calidade, subliñando a súa contribución ao desenvolvemento económico, á promoción turística e ao mantemento dun rural vivo e produtivo. Así mesmo, felicitou a todas as adegas participantes, poñendo en valor o traballo que realizan para situar os viños galegos entre os de maior prestixio.